فرض مقدس

ظلمك عادة ؟؟!!..لاء ده عبادة
فرض مقدس
مية نيلك ممكن تخلص..
دمع الناس جواك يجف ..
لكن ظلمك عمره ماينقص..

أنا مش باهتف علشان عايز منك حاجة
ولا هاشكيلك ضعفي وخوفي وقت الحاجة
انا مش عايز منك غيرك ..
لاابقى وزيرك ولا حتى سفيرك
اصل ولاد الكلب باعوك
علشان سبت في ايدهم خيرك
كتر خيرك ..
دايما ناسية اللي بيحميكي
دايما حاضنة ولاد الكلب ..
اللي حبك مالي جيوبهم
كارهة اللي يشيلك في القلب

بس وماله ..انا قابل ..
أيوه أنا قابل
بس بلاش التقل وصدك
هو علشان بحبك يعني
ابقى مشيت في طريق ضدك !!

طب وغلاوتك عندي هاعيش
رغم الظلم الساكن فيك
جوه ضلوعي
رغم دموعي
رغم التعذيب والتهميش

كنت باعد الغربة ثواني
راحت ثانية وكمان ثانية وكمان ثانية
بعد سنين وايام وثواني راجع تاني
اديني رجعت ...بعد ماضعت
وشفت الموت بينادي عنيا
وحدي رجعت ..
وسبت شبابك في التوابيت
سبت شبابهم ..
سبت خيالهم والاحلام
ده كان عايز ابنه ينام
من غير دمعة ..ولا محروم
وده كان عايز منك بيت
شجرة ..وفرحة ...وطرحة ..ولمة
ضمة أب
قلبه بيشكي بعد ضناه
دايما يصرخ وسط العتمة
يدعي الله ...
ان حبيبه يرجع تاني

وده كان عايز ..وده كان عايز ..
بس خلاص الكل سكوت

أما انا وسط النار والخوف والموت
وحدي اتمنيت ..ارجع حي ..
المح ضي ..وضحكة امي
قبل ماعمري كله يفوت
21/2/2015